كلمات أغنية سلايل سعد

من هاجس يطرق الفولاذ ويبت البواليد
وليا اهتوا اللعب حط السيم قوس للربابه

للمعرفه والعنوه نور في صدق المواعيد
الوقت محسوب والميقاف محسوب حسابه

يامرحبا بأسم أبو خالد وخالد جده سعيد
ترحيبتن من هل الترحيب مافيها حزابه

ترحيبتن مثل ريح الهيل فبطون البغاديد
وأهلا هلا من مقر الجود مافيها غرابه

له سيرتن ترفع الناظر ومحمود جنابه

أسمه وقسمه على وضح النقا ورموعه بعيد
لعل تسقي ثرى قبره هماليل السحابه

ماقفك يامحمد بن سعيد مادونه تصاديد
يفتح مجال المديح وكل فعل ينحكابه

كفييت وأوفيت يابنك الوفا وأعيد وأزيد
عربت منسب ولدك وكل باب له جوابه

والرآده اللي لها من خادم البيتين تمجيد
ماتحتملها ياكود متون عربين النسابه

شرواك يابو محمد صاطي قلبك وصنديد
ماضاع فيه التعب ولا تحسف من شقابه

اليين ثبت شداده والجمل ما شق نابه

والجو يكسر عليه اللي يعد الحايمه صيد
نواف في ماقفه مايلحقه جهد وكئابه

لو كل الاخوان مثله ما دعا الله فالأجاويد
تقول ما يرضعون الا لبن عز ومهابه

بأسم آل مطيليق ميزان الفخر ياليلة العيد
ثالث عياد السنه والعز تزهاكم ثيابه

أنتم سلايل سعد لا ثارت نحور البواريد
كم شيخ قوم طمع فيكم ومكنتو صوابه

وأنتم سلايل محمد ورعكم لو هو على الديد
يفك هجمة خواله لو تطش امه زهابه

ركنن من أركان صبيان الجحادر تفري البيد
بظهور سرد لها مع طلعة النور إنحطآبه

أنتم هل العرف والمعروف فتخان الأواليد
وسلومكم فالجزيرة من على وقت الصحابه

تاريخكم في البنوك ام الفخر ماهوب تفريد
يكفيك ٩٠ عام والشعرا في جوابه

الهدو من قسمكم ياصل لكم من دون تهديد
كلن يبي العافيه منكم ولو يفنا شبابه

كم حلتن بدلت ساعة فرحها بالتناكيد
مركاضكم نقذتن للطير وفروخ الذيابه

من وصفكم كالحرار الشقر معلقت العناقيد
تالي هداد الضحى بين الوريعه واللهابه

الشاعر معجب بن محسن المطيري
اداء جفران بن هضبان
بمناسبة زواج خالد بن محمد بن مطيليق ال سعد القحطاني