كلمات أغنية رمز ابن رمثان

ياساري الليل ومغلق ختوم الحدود
منته بويا الشعر والقاف والمسبحه

بعد الجوازات دور لك محطه وقود
ليل الشتاء ليل ونجوم السماء مدبحه

مسراك فوق ابيضن يلمع لميع العقود
ان ماتبادا عليه النور ماتلمحه

لا تلفت فى هل الرنجات واهل الفرود
من شب ليته خلافك نزحه نزحه

اتقول كحلن بعين الجادل المصبحه

اليا زويته غدا خط القريات عود
لا افتر ترس المكينه ياكل المروحه

عليه ياما وطيت ام رضمه والنفود
يمكن لو اني دفعته للمحيط اسبحه

فوقه صرفت المعاني مثل صرف النقود
اطا على كبد من جاب الخطا واجرحه

قريحتي دون ربعي ماتعرف الركود
لي هاجسن دون روس عجيم لا تنصحه

من دونهم لا احتما الماقف رموح هبود
ومفلح اليا من لقيت العالم المفلحه

اليا توار الضعيف امدور المصلحه

حان الوعد ياشبيب وحان قدح الزنود
غير ابتجح لا لقيت الناس متبجحه

انت ابن عمن بما حاشت يدينه يجود
واللاش يلقا من الشعار من يمدحه

هتلانين دون ربعك ماتعرف الصدود
لا بان سبر الجموع وغارت امصيحه

اسمك على راعي البلها عريب الجدود
واسمه من المجد والتاريخ من يمسحه

بعض المعاني يابن رمثان تحتاج كود
والعلم ماهو بلازم للجميع اشرحه

ماعندنا ياهل القعدان باقه ورود
مابالصياهد ورود وحاجتن مفرحه

جينا لكم ياهل الصيهد ومعنا قعود
ياهل الصفر طرفوا حقه من الاوشحه

متسندن من تهزاعه تبيح السدود
انقدمه ونتهقوى فيه وانرشحه

رمز بن رمثان ماجاكم يسجل وجود
الباب لمدورين السوم مانفتحه

ابيه قدم هل الصفرا ثلاثة عقود
وامه حذفنا العمايم يوم جات لقحه

امن المعنا خذا المفرع وكبر العضود
ندرا عيون المقرد والشبهه يفضحه

اليا مشى من طفاحه خفت عين الحسود
راسه تشطر ثلاث أمتار عن مذبحه

الصيهد اللي تجيه من القبايل وفود
بتثور فيه القنابل لاو طي صحصحه

الشوط حامي يابو مانع ولا انت بشرود
واللي بصدرك ليا جيت الصياهد بحه

خل البيارق ترفرف فوق راس العمود
ولا تشبح اللي يلد العين لا تشبحه

حنا نعرف المواجه مانعرف الوعود
وترا الخطاء فى بعض الاحيان ماندمحه

يامدور الهرج مابه من وري الهرج فود
كان انت تقدر تزحزح رمز قم زحزحه

تبرا له اهل القنازع مفحمين الكبود
يوم الاصايل تخالف والسيوف اسلحه

قبيلة جمعها يفني كبار الحشود
لا جاء نهار الطراد وراوحت قرحه

تودع كبار الاسامي في بطون اللحود
ان كانها فـ اضرحه والا بدون اضرحه

لاشك جعل الزمان الاولي مايعود
الناس في خير وعيون الفتن ممرحه

واليوم رايك يابن حثلين راين يسود
ياخال من يذري العالم طرف مشلحه

لاترحم اهل العبث ومسحبين الجلود
اضرب ضعاف الروابع ضربتن مبرحه