كلمات أغنية حنا سوى لاحتما الميقاف حنا سوى

ياهاجسي غرب المغرب وليلك ضوى
الحق على الليل قبل الوقت مايسرقه

الجو توه صفالك والطريق استوى
ماعاد باقي عليك الا قلم وورقه

اهم حاجة تركز لي على المحتوى
استثمر الوقت كله فيه واستغرقه

خلك على مستواك اللي على مستوى
والخثرقه خلها لمدور الخثرقه

وان كان مابه فعل ماتنفع الزبرقه

من قال غير الحقيقه قلت مالك لوى
شمس الحقيقه على وجه الثرى مشرقه

الذيب ياما على راس الطويله عوى
واخطاه واخطى عليه الرمح يوم زرقه

ياللي ورانا لسانك بالهروج التوى
اظهورنا ماهي بسندان يالمطرقه

حنا سواة القمر ماحن بنجم هوى
ويش انت جنب الجبل يانبتة العشرقه

فنجالك اللي تصبه مايشيل الخوى
اما اشربه جعلك الطاعون ولا رقه

والله ماتلقى طريق صوبنا تمرقه

علم بها كل راس مثل راسك ثوى
حنا على حق وانتوا ناس مستشرقه

الكفو يظهر عليك تقول لاعب قوى
واللاش يظهر وكنه كان في محرقه

وانا معك يابن عمي فالقدا والغوى
لا صار للخيل دبك وللسيوف برقه

حنا سوى لاحتما الميقاف حنا سوى
مابيننا تفرقه مابيننا تفرقه

ياربعنا يال شايع ياعدود الروى
كبد تبله وكبد فعلها يحرقه

عطاكم العز والقوه شديد القوى
واحسن نبا فالجزيره واطيبه واعرقه

العين فيكم وسيعه كبر عين الجوى
في ساعة يرخص المال احمره وازرقه

مليون ف ايديكم ارخص من بطاقة سوى
واسرع من البرق والبرقيه المبرقه

في راية اللي خذا فالطيب رتبة لوى
بو فايز اللي يدلون العرب مفرقه

وليا كوى ينجح الكيه لمنه كوى
يسلم سلامة عطب من سلم من مطرقه

لا كشر الوقت نابه والذليل انزوى
ماقام بالغتره البيضا يمش اعرقه

يامحمد ابن دغش فيك المديح اهتوى
صدق الغلا سندسه وفعولك استبرقه

والله ياخو فايز انك للمواجع دوى
كم واحد خوك قبلك بالجميل اغرقه

ماضاق بالك لو انه ضاق وادي طوى
مافيه باب وراه الطيب ماتطرقه

والضيف لا جاك يبشر بالشحم والشوى
بالله خفف عليه الطيب لا تشرقه

وانا ولد عزوة يوم الحروب شعوا
تقلط على الموت كن الموت شرب مرقه

جمع المنيدي لو ان المدح منها ارتوى
طرق على خشمه اني لطرقه لطرقه

الماقف اللي يبي قوه ولعنة ثوى
نلقاه بالوجه ماحن فالقفا ندرقه

لو ينطوي وقتنا تاريخنا ما انطوى
مثل الجبل طلقة الرشاش ماتخرقه