كلمات أغنية شواش ابن لبدان

يعجبني الطيب اللي وقفته تنعرف
لو كان مابيننا رفقه ولا معرفه

اشوف مدحه شرف واشوف عرفه شرف
واهل الشرف عمرها ماجات مستشرفه

ماهي بمدحه قرف ولا معرفه قرف
بعض المعارف قرف ومدوحها مقرفه

وانا هنا بالحقيقه كلها معترف
ماني براعي تزلافه ولا خذرفه

لو كان ماله مثل بحر الخليج غرفه

من فعل ابن عوضه اللي يعرفه من عرف
جا للرجال التعاجه والنسا غطرفه

بالسيف الاملح خذا الاول وسيف الشرف
واطيب نبا فالمواقف وانبله واشرفه

الله ياكم عطا والله ياكم صرف
والله ياكم يمينه فالعطا مسرفه

يقلط على الكايده مايتعز فالطرف
لاطرف اللي يسحب مشلحه بطرفه

دون الرقاب الخضر والمحجر اللي ذرف
الشيك مفتوح واللي يصرفه يصرفه

طبيعة من ثقه ماهي بمن عجرفه

بدا حياة الكرم على حياة الترف
كم موتر في طريق الطايلات كرفه

اما جميل حرف له موتره وانحرف
ولا ورى ذاير في مرتعه مترفه

بيته ذرى اللي من صدوف الزمان انكرف
والعز فمراحه ومجالسه وغرفه

في راسها مثل ماقال المثل ويخرف
عذق الكرم والمراجل والجميل خرفه

ماهو بمن قوم مدري ماعتقد ماعرف
لا والله الا مقر الطيب والمعرفه

ورى التفاهات والعيلات ماينجرف
سيل تكبر على عقم الردى وجرفه

والنعم ماجاه من بنده ولا بلشرف
خذاه بفعول واشناب لها رفرفه

حلال ربعه نهار الحرب ماينزرف
من قوهم مايفكر خصمهم يزرفه

دقلاته تجعل الصاحي يصيبه خرف
لو انه اصحى من الصراف في الصيرفه

من عاندوه ال مره خش ولا انصرف
وان ساندوه حقنوا دمعه قبل يذرفه