كلمات أغنية يانزيه العرض

يا بعد عمري وضحكة حاجبي وايامي
يابعد كل السنين الماضيـه والجايـه

يا بعد حرف القصيد ودفتري واقلامي
يا مرض قلبي وعلة خاطري ودوايه

يا سـبب جزالة ابيوتـي واصل الهامـي
كل ما جت بك قصيده تدهش القرايه

كل جزله فيك فيها بصمتن لبهامي
هاجسي ماخذ من المعبود فيك وصايه

وانطلق في يمتي واسري مع السرايه

منزلك فالقلب يا هادم جميع اصنامي
كن ربي باعثك للي عشقك هدايه

وجيت لك وانا مركز في هواك اعلامي
قلبي وروحي وعقلي كلها شرايه

الوسيله حبك وعشقك يا كل احلامي
وغير وصلك يا غناتي مال عايض غايه

ماني مصدق بك العذال واللوامي
كل طيب له عدا شف كيف كثر اعدايه

من كثر ما يكرهوني فكرو بعدامي
دايم ضعاف الروابع للردى غوايـه

والسهم صوب حشاي ولا كسر لي رايه

وانت لامني فقدتك فاقدن لحزامي
كيف تزعل وانت من دمي ومن مجنايه

جيت لك يا سيدي بالضيق حامي حامي
وقبل تبدى بنهيارك منهدم مبنايه

يا نزيه العرض قدرك داخلي متنامي
قدسك قلبي تقول انه مقدس ايه

ايه لك فالقلب عرش ولك مقامن سامي
لكن ظروف الزمن ماهي على مشهايه

يا عريب الساس سامح زلـتي واجرامي
كن قلبي ينبري منك على برايه

يا رفيقي عدها رميه بليا رامي
طالبك يا نور عيني لا تجيب اقصايه

والله ان الحزن بان بوجهي وسلهامي
والوله خلا ذيابة خافقي عوايه

ضاقت ابي المستديره وضاق بي هندامي
اشهد اني احتاج لمهدي قوي ورعايه

كل ما تطري على قلبي تضيق انسامي
ولا توسع ضيقة رقيه و ماي قرايه