كلمات أغنية حنبنيهو
حنبنيهو
البنحلم بيهو يوماتى
وطن شامخ
وطن عاتى
وطن خير ديمقراطى
وطن مالك زمام امرو
ومتوهج لهب جمرو
وطن غالى
نجومو تلالى فى العالى
اراده
سياده
حريه
مكان الفرد تتقدم
قيادتنا الجماعيه
مكان السجن مستشفى
مكان المنفى كليه
مكان الاسري
ورديه
مكان الحسره اغنيه
مكان الطلقه
عصفوره
تحلق حول نافوره
تمازج شفع الروضه
حنبنيهو
البنحلم بيهو يوماتى
وطن للسلم اجنحتو
ضد الحرب اسلحتو
عدد مافوق ما تحتو
مدد للارض محتله
سند للايدو ملويه
حنبنيهو
البنحلم بيهو يوماتى
وطن حدادى مدادى
ما بنبنيهو فرادى
ولا بالضجه فى الرادى
ولا الخطب الحماسيه
وطن بالفيهو نتساوى
نحلم
نقرا
نتداوى
مساكن
كهربا ومويه
تحتنا الظلمه تتهاوى
نخت الفجر طاقيه
وتطلع شمس مقهوره
بخط الشعب ممهوره
تخلي الدنيا مبهوره
اراده
وحده شعبيه