كلمات أغنية القمر بوبا
الصغيره شجيره الاراك
ياقمر عشره الفي سماك
شاغله روحي وقلبي المعاك
وين لقيتك لامن اباك
القمر بوبا عليك تقيل
العيون الما بدمعن
نامن او صاحيات يبرقن
لا بصيدن لا بعشقن
سرهن في الجوف يحرقن
كشفن رموشن او غمضن
كلو موت ماتقول برحمن
القمر بوبا عليك تقيل
الصغيرون الما كبير
الرقيبه قزازه عصير
السنون براقن يشين
العيون متل الفناجين
مابتحش قشه تناقير
مابتشيل جردل على الزير
الزراب فوقا تقول حرير
شتتي شبار يامضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل
الجزير ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سالمه
يا غرق يا جيت حازمه
القمر بوبا عليك تقيل
القديما قديما الحمام
الوديزين في موجو عام
يا مرايقه قليله كلام
وا حلاتا تقول السلام
القمر بوبا عليك تقيل
الغزال الفوق في السلم
المحبه تزيد الالم
كل يوم اصبح لي في هم
سيسبان عودك منظم
شمعدان نفسك يامختم
البرتكان نهدك مدردم
القمر بوبا عليك تقيل
الصغيرون ام الجنا
ياكريم ربي تسلما
تبعد الشر من حلتا
جنه للام الولدتا
الفي جبل عرفات وضعتا
تسلم البطن الجابتا
دي تربايه حبوبتا
التميره الفي سبيطتا
الصفار صابغ خضرتا
معزوره امها كان دستا
وا هلاكي النار شافتا
معزباني انا ود حلتا
القمر بوبا عليك تقيل
الدفيفيق الدابو ني
البسيمتو بتكويني كي
اهلو ضنو عليها وعلي
حبها النساني والدي
ما بخليك ان بقيت حي
يا قصيبه السكر الني
نهدك الما رضع جني
ووب على امك ووبين علي
القمر بوبا عليك تقيل
الديوان الديمه مقشوش
بالزهور والورد معروش
بالحرير الاصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل
بحر الدمير العض ونزل
مره يسقي الفل والنخل
فيهو عام وزينا وقدل
ياهنينه البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل
المبارك شيخ الضهر
العليك ساسكت وفتر
قلي جنيت ولا دستر
واي انا المرضان مكنتر
جابو لي حكيم خير وشر
قلي يا زول مرضك كتر
سببك كم شلاخا خضر
القمر بوبا عليك تقيل