كلمات أغنية وا اسفاي
وا اسفاي
وحاتكم انتو وا اسفاي
اراده المولى
رادتني وبقيت غناي
اسوي شنو مع المكتوب
اسوي شنو
براهو الواهب العطاي
منو
منو البدور يساهر الليل
ويسافر
فوق جناح الشوق
يكوس نجما بعيد ضواي
منو
اذا وصفولو ارض الحور
تلاقي قوافلو طول الليل
تشق التيه
تجر النم
مع الحردلو في الدوباي
وا اسفاي
ببيع الدنيا
كل الدنيا وا اسفاي
عشان خاطر عيون حلوين
وا اسفاي
منابع الطيبه متجاورين
وا اسفاي
ومتسامحين في السمحين
واسافر فوق صبي العين
معاك سلامه
يادنياي
بتمدد وبتوسد
وساده شوق
وبنوم مرتاح وخالي البال
واقالب تاني عهد صباي
عشان ما تبكي
ببكي انا
واحاكي الطرفه
في نص الخريف بكاي
حمولي تهد جبال الشيل
وفايت في العتام الليل
ومتوكل عليك يا الله
دافر الليل
بريق البسمه ان لاح لي
بتتفتح مشاتل الريد
واحسك جوا
زغرد فيها صوت الناي
وا اسفاي
وحاتكم انتو وا اسفاي
اسفاي
اذا ماشفت ناس سمحين
يتاتو
زي قدله جنا الوزين
يتاتو
تلاقي قليبي يرمح جاي
لما يتاتو
زي قدله جنا الوزين
يتاتو
حليل الكان بهدي الغير
صبر محتار يكوس هداي
من ناس ديلا
وا اسفاي
من زي ديلا
وا اسفاي
اراده المولي رادتني
وبقيت غناي