كلمات أغنية بلد رايح
حاسال عن بلد رايح
وافتش عن بلد سايح
واسال عن امانينا
اللي ما بتدينا
صوت صايح
واسال وين مخابينا
اذا جانا الزمن
لا فح
واسال عن بلد مجروح
وعارف الجارحو ليه جارح
وابكى على بلد ممدوح
وعارف المادحو
ما مادح
واحلم بي حلم مسروق
لا هو الليله
لا امبارح
اعلق في جناح سفري
خطابات لي زمن فجري
وادخل من درب سري
لكل مضاجع الاحزان
واضفر من شجر بلدي
بروقا مارقه من صدري
حاسال عن بلد غاط
لحد الليله في الوجعه
انط فوق سرجي واتحزم
اقوم من وقعه
لي وقعه
اخت ايدي البتوجعني
على السام البراجعني
واسال
يا وطن يا بيتنا
ليه شوقك مواجهني
ليه حبك مجهجهني
وليه تاريخ زمن خسران
موكر لسه في شجني
حاكتب لي شجر مقطوع
مسادير
يمكن يتحرك
خطابات لي طفل مجدوع
يقوم
يجرى
يقع
يبرك
رسالهه لكل قمريه
اذا دم الشقا اتوزع
على كل البيوت
ما ترك
واسال
عن وطن رايح
واديكم خبر جارح
بانو جميع جموع الناس
حيفضلوا لا كراع
لا راس
ونشترى في الدكاكين يوم
مسابح من دموع الناس
مساحيق من هموم الناس
زهج
يتعبا في الاكياس
ونعلن في المزاد علنا
وترغي الجوقه والاجراس
" نبيع الطفله والكراس"
واصرخ
ياوطن يا بيتنا
ليه ما تبقى لينا الساس
قدر ما تجري فيك
افكار
يزيدوا الحبس والحراس
قدر ما تجري فيك الخيل
تدوس الهيبه
والاحساس
واسال
يا وطن رايح
اذا كل القبور دخلت
بيوت الناس
بلا اسئذان
بلا صلوات
بلا اكفان
جريمه اسائل الدفان
حريمه طلب تمن قبري
من البايع في اي مكان
واقولك يا وطن
رايح
واقولك يا وطن
امر
سلام النفس ما كافر
ولا كافر
ولا كافر