كلمات أغنية حبك ميزان
حبك ميزان من نوكف يوم الميزان
ميت عطشان بس بيدك تروي العطشان
ودعنا احباب ونودع كل يوم احباب
من يندك باب نتخيل ميت عالباب
واعزاز تغيب ننساها وترحل غياب
لكن يا حسين كمصابك ماشفنا مصاب
من ينجمع كل الحزن وانقيس حزنك بينا
مانوصل اللحظة سبي شافتها عين اسكينة
كل ما نلف ميت ابجفن يتذكرك ناعينه
من جسمك اتغطه ابشمس والثوبك امسلينه
يضل جرحك جرح ينزف يمحراب العزاء
على اعتابك طواف الحج نطوفه ابكربلاء
يالمقدم نحور قرابين الولاء
واليزورك يزور عرش رب السماء
سلام الله سلام الله على اسمك يا حسين
سلام الله سلام الله حبيبي يا حسين
عشاك اونار مشتعلة اكلوب العشاك
نشتاك انزور وانزور ونرجع نشتاك
يحسين جروح زوارك يحسين اغماك
تتمنى تموت بالحضرة ولا يوم فراك
يدري اليطوف بحضرتك يلكه ابرواق الحضرة
اربع طعش معصوم اجت تستقبله اوتنتظره
واسمه ابسجلات الخدم زاير حبيب الزهرة
من باب بيته الكربله كل خطوة حجة اوعمرة
وابو فاضل هله ايكله هله ابضيف الحبيب
فلاعوفك يمن كاصد على حسين الغريب
دعائك مستجاب ولك بالحب نصيب
تجي بيوم الحساب وانا الفوكك رقيب
سلام الله سلام الله على اسمك يا حسين
سلام الله سلام الله حبيبي يا حسين
حبك ميزان من نوكف يوم الميزان
ميت عطشان بس بيدك تروي العطشان
يا حسين اتشوف بعيونك عين الرحمن
يملبس راس كل خادم تاج السلطان
انته الذبيح اونعتقد قد فاز الك من يسعى
وامك قبل هاجر جعل بيها الاله الرفعة
لو حاضرة ابطف كربله طافت اشواط السبعة
جا فجرت زمزم الك وانطتك ماي البضعه
كفاك اول نحر ناده خذيني يا سيوف
ومعاك كلك كمر هاشم واشوف اشماتشوف
اخوك اوطوع ايديك لمن ذب الجفوف
سلام الله عليك يا قربان الطفوف
سلام الله سلام الله على اسمك يا حسين
سلام الله سلام الله حبيبي يا حسين