كلمات أغنية البدو

‏الله من قلبٍ على مرتع الخور … ‏كنه هشيمٍ دمدم العود بالي

كني عضيض اللي مع الخبت مسعور … ‏باقي من المدة ثلاثة ليالي

يكفخ بلا ريشٍ وينفخ بلا زور … ‏ويكفيه عن رد الجواب السؤالي

دنياك يا خالد على السرج والكور … ما تفجع الا من زحول الرجالي

تجبر عراوي الكلب والبوم والثور … ‏وتكسر عراوي طيّبين العيالي

تنزل مقام مخرّقة كل طابور … ‏وترفع مقام مخرّزين النعالي

شاخت بها الأذناب لحّاسة السور … ‏سود الوجيه مبيّعين الشيالي

فيها وليد اللاش عالم ودكتور … ‏ولقيطة الحجّاج حضرة معالي

وسلالة الجزّار مطوة وساطور … ‏تأمر علينا في العصور التوالي

فإن كان يا خالد معنّى ومنجور … ‏ما احدٍ يا ابن مدعث من الوقت سالي

وانته عريبٍ وافي الجد مخيور … ‏يا صلب زايد يا كريم السبالي

أما معي تقطع من العرق مشبور … ‏والا قطعت العرق كله لحالي

روحي مثل روحك على سبق مطيور … ‏ما بين قولة لا تجين وتعالي

فكان الزمان بحدّة البدو مأمور … ‏يا لوم قلبي يوم ينحاس بالي

ترى يخالد ما ورا الشوف مذخور … ‏ولا احدٍ يهدّ الطير والقاع خالي

من عقب ما حنا ذرى كل مظهور … ‏على سروج الصافنات المتالي

تنتف شواربنا على غير مبرور … ‏ونشرب مرار ويشرب الغير حالي

ياطى الثعل هامة ثمانين منعور … والذيب عوّد فرْسةٍ للرخالي

وولد الردي لا جاء على راس عنقور … ‏يبلاك في نفسه لو أنّك مثالي

صيده ليا جابه زريطي وعصفور … ‏يوم النشامى ما تصيد الهزالي

بالهرج عدّة نابية كل عثمور … ‏والفعل ما ملّى صغار السحالي

يوم انّ كلٍّ إلْه حيلة ومقدور … ‏جداه كشخة غترته والعقالي

ولدة حرامٍ بارد الخدّ مقصور … هيسِ يكبّر موخره بالسمالي

سبوٍ جبو قدره مع الناس محقور … ‏وش عاد لو عدّى الرجوم العوالي

خبلٍ يدوّر مع قفا الناس ثغرور … ‏والقفو ما نوّخ ظهور الجمالي

والعنز لو ربي رزقها بزمّور … ‏ما يحتميها من ذياب السهالي

ومن لا يحوش الطيب والعمر ميسور … ‏ما يدركه لي ما غشاه الثفالي

فياللي تعذربنا هبيلٍ ومطيور … ‏أجْل البداوة عيب ؟ لا يالخمالي

كان البداوة عيب ما نيب مصغور … ‏يا طيب عيب معطّرين السلالي

حنا البدو أحرار وآسود ونمور … ‏سيفٍ يقصّ مروبعات الحبالي

حنا البدو حنا عمى كلّ مغرور … ‏ما حنْ عيال مضبّبين الدلالي

يشهد لنا من حدر الالحاد مقبور … ‏ويشهد لنا في القاع من لا يزالي

حنا البدو سيفٍ بالايمان مشهور … ‏وتشهد عليه قصارها والطوالي

لا نقطع الذمة .‏. ولا نشهد الزور … ‏ولا نتلب العاني ليا جاك جالي

ولا نقلب الملة.‏. ولا نطرد العور … ‏ولا نسهج الشينات وسط المفالي

ولا ننقل العجرا .. ‏ولا نطلب الغور … ‏ولا نلحق الكف اليمين الشمالي

ولا نذبح العجفا .‏. ولا نسبق الدور … ‏ولا نطرد المقفي لشدّ الرحالي

ولا نزرع الصبخا .‏. ولا نحفر القور … ‏ولا نطرح الا من السمان الجزالي

ولا نعبد الرتبه ولو هو امبراطور … ‏ولا نهاب الا عزيز الجلالي

ولا نخلف الهقوة.‏ولا نطلق الحور … ‏الا على طيب وحافظ ووالي

ما نقطع الساقة.‏ولا نبعج الشور … ‏ولا ندغر القالة بقيلٍ وقالي

ولا نبخس الكيلة.‏ولا نجحد النور … ‏ولا حِنْ من اللي يكنزون الريالي

ولا نشعب الذلة ولا نخاوي البور … ‏زرق العيون ضراب شرْد السحالي

ولا نضرب الطبلة.‏ولا نشحذ الكور … ‏فضلة عبيدٍ للأكابر موالي

ولا ندهل العِبْلة ولو طورها طور … ‏والرزق في يدْ من عليه اتكالي

حنا البدو يوم اكثر الناس طرطور … ‏ناطى صما صميم الجبالي

عشة,‏ولا قصرٍ على الذل معمور … ‏نلعب عليها الهمّلا همّلالي

عشة تدوم ولو على سبعة بحور … ‏ولا قصر لا مالت به الريح مالي

حنا البدو يوم اشهب الملح منثور … ‏ياما خزمنا روسها ما نبالي

رجّالنا في حومة الحرب مسطور … ‏ورضيعنا مع ضرب الاشهب يلالي

حنا على كبد العدو مرّ ممرور … ‏وعلى الخوي ميٍّ قراحٍ زلالي

ما قد وِخِذ من حقنا كبر الاظفور … ‏مير الدهر خلى الخفايف ثقالي

من خلقة الدنيا إلى نفخة الصور … ‏والبدو أخَيْر الناس بأول وتالي

ذبّاحةٍ يوم اول الوقت مذعور … ‏حمّاية المَرْكي نهار القتالي

فحولٍ وسادتنا حصا كلّ شنظور … ‏ولحافنا بيض النجوم المدالي

ما نبدي الشكوى لخاطر ومخطور … ‏ألا على الواحد أحد ذو الجلالي

ولا نغبط الحاكم على حكمه الدُور … ‏اليا رعينا في الفياض الخوالي

ياما حلا سوق المعاشير بقفور … ‏ونجم السويبع مثل قرن الغزالي

في خايعٍ توه من الوسم ممطور … ‏نوّار عشبه مثل نقش الزوالي

إبْلٍ رعوها البدو مع كلّ دعثور … ‏تسوى شَبَحَات الوجيه المكالي

روحك يا ابن مدعث على ريشة كرور … ‏احذر بها صفر العراقيب تالي

وان عذربوها بأشقر الكنت معذور … ‏أغاديه يِذهب عن حشا الجوف صالي

وان عذربك من سِلْحة الناس مسمور … ‏اشرب وطقّ مشقّره لا تمالي

قبلك شرَبْه الجِهْر ناصر ومنصور … ‏وعضيب وعقاب عنِزَة والهلالي

وشرب ازرق الدخان ماهوب محظور … ‏العيب زرع الهافية عند غالي

ابشر يخالد دام لي دمٍّ يفور … ‏مانيب من هو قال دوّر بدالي

أما خذينا حقّنا واقبل النور … ‏ولا ترانا من بنات الحلالي

ماني وانا ناصر بهورٍ ولد هور … ‏وانا الذي من راس عمي وخالي

فيالله في كونٍ مثل كون جمعور … ‏هشهاش باروده سوات الخيالي

يصبح به الهافي عن العز مكسور … ‏ويصبح به الطيب على راس عالي

ناخذ به خفاف الموازين بالدور … ‏وكم راس نذلٍ عن كتوفه يشالي

والنصر الى قالوا على الضد منصور … ‏ما هو على زعْلة خويٍّ قبالي

وما قلّ دلّ وزبدة الروض حمرور … ‏والا كثير الهرج ماله ومالي