كلمات أغنية عالي مقام

ارتقيت لقمة فاقت حدود الغمام
وارتقى بي هاجسي في مدار المشتري

وصار في عيني جبلها كبر راس النعام
واستوى لي قاف ماهو بقاف منبري

مبتعد عن من لسانه على المقفين سام
ناقلين الهرج والنم ماهم بذخري

ما وقفوا وقت الشدايد ولا لبو مضام
لاذكرت جموعهم شمت وادق انحري

دام مافيهم حزام اشد به ظهري

ثم جذني نجم يدل نوره في الظلام
السناد اللي على الطيب والصعبه جري

ياسلامي صوب شيخ المواقيف العظام
والعظام تصير عنده مثل عين الزري

داهيه ما يعترف في قوانين و نظام
وفي حراج الطيب دايم يبيع ويشتري

ذا زياد بن سعد لا بدا فـ اول الكلام
فعل طيبه ينعرف من قبل ماينقري

والله اني افتخر يوم اعده لي حزام
صرت من بعده عن الضيق وهمومي بري

ولو يشح الوقت يبقى من العزه ثري

والردي ما ينتهض في المواقيف الجسام
لو غدى صدر الخوي من همومه منفري

ما ارتضى مقامي انصى سوى عالي مقام
و ما يشيل الكايده كل من عظمه طري

لانخاه اللي من الهم ما يهنا المنام
جات فزعه عاجله من قبل مايحتري

دايم اقواله تجي مثل فعله بالتمام
ودايم والنعم تطرى ليا منه طري

وقفته تبقى على الصدر تذكار و وسام
يوم كان الوقت ينوي بكسري و قهري

جيته و اعرفه دايم ملاذ للحيام
ويجلي العتمه عن الليل ويزود نظري

ينعرف ابو سعد كل ما عدوا الكرام
عون من متنه من الحمل صاير مزدري

جعل عمره عد مارفرف جناح الحمام
والردي لو طال عمره ما احد به دري

ترثة اللي من نصاهم رقى قمة سنام
مايخيب اللي ذخر في لزومه دوسري

لو ماني من سبيع المطاليق الحشام
قلت انا صلب الدواسر واكبر عنصري