كلمات أغنية لا تنجع

يا الشايل شمسك في جواك خليها تبين للناس تطلع
يا النازع فرحه والده هناك غير حس اهاتك ما بتسمع

يا الناسي اللبقه المفتوحه دي بلاك طوريتك ما بتقرع
المنجل في راس التمره ناسيهو وامك ما بتطلع
الكتقه وقعت والحملان في اللوبي بقت تجري وترتع
والزير الفي بيت الضيفان حرمان لا نز ولا نقع

يا السبت عقابك وروحت وحيات عز بلدك لا تنجع
الشتله تقولك لاتنجع الواطه تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع

ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاه
قام بارى الحيطه واتوكل ويقوم فد مره وميه يقع
ويقولك يا المبروك ارجع

ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح

مجلوبه الفرحه ومفروشه من ضحك الناس دايرين ارباح
لو كان في ايدن ملك الكون كان لمو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان امسكين باعو الارواح

وين تلقى الفرحه وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح

سايب اهلك ونخلك راحل قول وين ماشي وين ا صاح
الشمس النايري ابت تطلع النيل يا زول اصبح رحراح
الضل قصر ما غتى رويس ولدا ساكب عرق الكتاح
الواطه ابت تديك الخير ولا انت عليك ما هابي رياح

قولي وين ماشي ووين غاشي ولي شن سايب بلد الصلاح
النسمه ان جاتك بتجيك ملياني عبير عند الفياح
المويه ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح

ارجع ارجع يا زول ارجع
الضحكه هناك من جوه الجوف الفرحه هناك ما فيها الخوف
الشقى ارحم في ضل النيم وبعيد من ناسا واقفه صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوه حاج الخير مكتوف
دكان الشيخ فوق الواطه كيمان كيمان ما فيهو رفوف