كلمات أغنية الملحمه قصه ثوره
لما الليل الظالم طول
وفجر النور من عينا اتحول
قلنا نعيد الماضي الاول
ماضي جدودنا الهزموا الباغي
وهدوا قلاع الظلم الطاغي
وفي ليله وكنا حشود بتصارع
عهد الظلم الشب حواجز
شب موانع
جانا هتاف من عند الشارع
قسما قسما
لن ننهار
طريق الثوره
هدى الاحرار
والشارع ثار
وغضب الامه اتمدد نار
والكل يا وطني حشود ثوار
وهزمنا الليل
هزمنا الليل
والنور في الاخر طل الدار
والعزه اتهادت للاحرار
وطني انحن سيوف امجادك
ونحن مواكب تفدى ترابك
ولسه الشارع بشهد لينا
في يوم الغضبه حصاد ماضينا
مشينا نعطر حقل الثوره
بدم نفديها بلادنا الحره
وكان اكتوبر فجر الغضبه
كسرنا قيود الماضي الصعبه
لما مشينا مواكب صامده
تهدر وتغلي وتهتف راعده
الرصاص لن يفنينا
الرصاص لن يفنينا
وسال الدم في ارض الوادي
فدينا النور بالروح يا بلادي
وكانت صفحه حكاها العالم
وفجر اكتوبر طل وسالم
كان في الجامعه موكب هادر
صمم يجلى الليل السادر
وكان الليل السادر غادر
فجر غدرو سموم دخان
ورصاص من صوته صحا السودان
والشعب الثائر
صمم هادر
يصرع ليلنا الداجي الطول
وكان القرشى شهيدنا الاول
وما اتراجعنا
حلفنا نقاوم ليلنا وسرنا
نذرنا الروح ومسكنا دربنا
للشمس النايره قطعنا بحور
حلفنا نموت او نلقى النور
وكان فى الخطوه بنلقى شهيد
بى دمه بيرسم فجر العيد
يا اكتوبر
انحنا العشنا ليالي زمان
في قيود ومظالم وويل وهوان
كان في صدورنا غضب بركان
وكنا بنقسم بالاوطان
نسطر اسمك يا سودان
بدمانا السالت راويه الساحه
وحلفنا نسير ما نضوق الراحه
شهرنا سيوف عصيانا المدني
وكانت وحده صف يا وطني
ايد فى ايد حلفنا نقاوم
ما بنتراجع وما بنساوم
بينا وبينك ثار يا ظالم
خطانا تسير في درب النصر
هتافنا يدوى يهز القصر
كسرنا حواجز ازلنا موانع
صفنا واحد
عامل وطالب زارع وصانع
وهزمنا الليل
هزمنا الليل
والنور في الاخر طل الدار
والعزه اتهادت للاحرار
يا ساحه القصر يا حقل النور
ويا واحه بتحضن روح نصار
روينا ورودك دم ثوار
وشتلنا فضاك هتاف احرار
خطينا ترابك احرف نايره
بتحكى سطور ايامنا الثائره
وشلنا الشهداء مشينا ونهتف
وجرح النار في قلوبنا بينزف
سجينا الشهدا وجينا نقاوم
ما بنتراجع وما بنساوم
وفجاه ونحن صفوف بتصمم
زغرد فجر الثوره الحالم
والنور في الاخر طل الدار
والعزه اتهادت للاحرار
قسما قسما يا اكتوبر
نحمى شعارك
ونجنى ثمارك
ونرفع رايه الثوره الغاليه
عاليه ترفرف فوق الساريه
عليها شعار الثوره الاكبر
رسمه النادر زاهي واخضر
ولسه ينقسم يا اكتوبر
لما يطل في فجرنا ظالم
نحمى شعار الثوره نقاوم
نبقى صفوف تمتد وتهتف
لما يعود الفجر الحالم يا اكتوبر