كلمات أغنية سل سيفك
سل سيفك تردى الحال يا سرجون
غده الكهان بسم الالهة الساسة
واختل الوضع والضيم بينا يجور
على هالحال كلمن حابس انفاسه
مو تعبت اكد والموت صافح كيش
وياهو اللي يفكنا وكلها علاسه
الچان اول امس حافي بدروب اشور
صفا كاهن تحضر الناس قداسه
وحرامي الچان يسرق بالحواري بيوت
صار اليوم هو اليلزم حراسة
بدا يعم الجهل ويصير عدنا ادمان
واستشرى الفساد وزادت اجناسه
اكل بينا الفقر تعب اهلنا العوز
وقفل بابه الزمان واعلن افلاسه
تاهت والشعب مخنوگ بالوركاء
وناقوس البطالة دقت اجراسه
استزرت والعيون بنص اساها اتطوف
ودموع الكهيل اتزيد وسواسه
استزرت والضعيف يريد راحة بال
وشح هذا الوكت ما طمن احساسه
كثرت الهتنا والوطن قربان
صنم يعبد صنم ويبوس براسه
سل سيفك بعد شمتاني يا سرجون
ترى استفحل السم وضحك دساسه