كلمات أغنية الشتا

القهوة من كتر الكتابة عنها باخت
فيه حاجات زيادة مدحها لعنة
يارب هبنا قهوة تشبه حزننا
وادينا حد اصم يسمعنا
وادينا قلب نبوحله مايخوناش
وادينا حضن نروحله ف يساعنا
صدرك شوارع ذكريات تايهين
والحزن شاعر له هدوءه وحكمته
سالو الكمان يا هل ترى بتحب مين
ضاق المكان مافضلش غيرها ف رنته
اتنين ف حرب وخرجوا الاتنين مقتولين
وحضنها هربت منه
مين اللي سلم للشتا المفتاح
طعم الحاجات الدافية ف الليل والمطر
زهدك ف كل الهربانين من جنتك
البنت كانت حبتك ياعبيط
حبتها ليه ساعة ماكانت كرهتك
وازاي بتعمل من سجايرك بلونات
وتسيبها تطلع للسما دخان
البنت مشيت
وانت مت عشان دخنت نفسك ف الصحاب سرطان
وعطشت من شرب السما ف البحر
والبحر من كتر الغرق عطشان
فبلاش تفكر كل ماء يرويك
اياك تفكر كل حضن شاريك
فكرت يوميا ف كل الناس
ونسيت تفكر ف اللي فكر فيك
في الليل مساحة اسمها الارشيف
كل الاغاني والصور والذكريات
ف الليل وكل المرتاحين نايمين
هتمر جنبك لحظة تسوى ساعات
انا كتفي ممكن تلمسه يشوك غياب
انا قلبي ممكن تعصره ينزل بنات
لكن لسوء الحظ او حسنه
مابقتش عارف انسى دي بالذات
وكانها كوردات عمر خيرت
ريحة الشوارع وقت فجرية
كل البنات هي وهي البنات كلهم
وانت اللي بتروحلهم مابيطلعوش هي
طب ايه يا عم الشتا
انا تحت عيني اتهرى من كتر ما حنيت
فكرت فيها ضحكت
ضحكت فجاة بكيت
ليه الشوارع كلهم قاصدين
يفكروني باللي مش فاضلين
والقهوة كرسي الاعتراف بالذنب
تشرب تقول كل اللي سابك مين
ليه الشتا والبحر اتنين صحاب انتيم
طب ليه ف كل البلكونات حكايات
فتحت عيني جدي غمض مات
وكبرت بيتنا لم عفشه وهج
والدي ماحاجش بس شوفته ياحاج
وايديه ف خدي ختم نسر كبير
امي اللي شيلت ف حضنها جناحات
وبقيت ف طيبة كل حضن باطير
وصحابي دفتر خدت صفحة ف مطلعه
منهم تلاتة توامين وضمير
شكرا لان الشتا عرانا مفضحناش
شكرا لان الذكريات مماتتش
اكبر دليل عندك انا
انا لسة اهو مانستش
شكرا ل بلة طين ف ديل التوب
شكرا لمطرة تبلنا ننشف
تعرف يا عم الشتا ولا بلاش تعرف
ف مثل هذا الوقت من كل عام بيفوت
باحيا واموت مرات وف كل ما احيا بموت
وعملت منك ذكريات وحنين
والقهوة سادة ووشها مظبوط
وعملت عالم من خيال الوان
وعملت صورة بالف حس وصوت
وفتحت صدري للغياب شبابيك
دخل الحمام عشش وصارله بيوت
لا البنت راجعة ولا الكلام يكفيك
ولا ضحكي باكي ولا العياط مبسوط