كلمات أغنية اسكت
الركعه زغيره والشك جبير
يا ناس الابره ما تحفر بير
واليحجي يبتلي على عمره والساكت خانكته العبره
والطايح رايح حشه كدره والعايش عايش بالقدره
من زاخو لحدود البصره ومن نكره سلمان لبدره
والله واحدنا خلص صبره شيسوي وشيدبر امره
والمن يحجي ويفضح سره ومنهو اليسمع ومنهو اليقره
شنها لعيشه الكدره المره
الواحد صبره موصبر ايوب
اليصبر جم مره اليصبر جم دوب
كل يوم مغيمه ومغبره ومحمره الدنيا ومصفره
دتعجج وتزخها بمطره وتخلي الوادم متحيره
وكل واحد غركان ببحره ويضربلك جف يمنه ويسره
وكل واحد سكران بخمره يعربد ويهدد بالثوره
ذاك من ذاك اللي نقدره لمضحي بمصلحته لقطره
وصاحب مبدا ويحمل فكره
من زاخو لعقره لحدود الفاو
كلمن من كتره ضاربله كلاو
وياهو تلزمه مطلع صدره وشايف نفسه الحاكم بمره
كلها تدور سلطه وامره براسي وراسك احنا الفقره
حتى موظفنا الهل كبره نافخ نفسه ويحجي بنتره
لو راجعته يكلك بكره جلمه ولخره اطلع بره
الله يعينه ولله دره للحافي وبطرك الوزره
وللي محد لازم ظهره
من بعد العسره لابد تيسير
يردلها القدره وكل شي بتدبير
ناكوط الحب كطره وكطره والاصلاح يتم فد مره
الشجر اليابس لاتزبره اشلعه من عركه ومن جذره
عضو الفاسد لو مانبتره نظل نتالم ونجر حسره
ولو ظلت على هذا المجره نتواجه بالدار الاخره
لكن بلجن نطفر طفره نصبح لنها ربيع وكمره
لابد بعد العسر اليسره