كلمات أغنية درة العالم

دره العالم ترى اللي ما يعرفك
ما يقدر هالجمال اللي قباله
وان ضحكتي علمي الاحساس لطفك
بعض لطفك يكفي هالدنيا يا هاله
كل دمعات الفرح راحت تزفك
عاشقك هالنور لحدود الثماله
خطوتك عزف الحياه يا زين عزفك
حاله ما كنها تشبهك حاله

كن سحر الكون متعلق بطرفك
لا سالك الحسن جاوبتي سؤاله
والمجره كنها شال بكتفك
من يلوم البرد لو اهداك شاله
سكري باب السما المفتوح خلفك
واعتلي عرش الحلا واغزي مجاله
رقه احساسك تساوي كل ضعفك
قوتك قلب تحدى من مشى له

ما الوم الحب لو حاول يخطفك
ويتعلي بك الى واسع خياله
والقمر تمثال يتباهى برفك
انفضي غباره وردي له جماله
لا كتبتي الورد بس ابدي بحرفك
يتبعك هالورد يمشي لك لحاله
كل ضي الناس من بعضك ونصفك
لا ظهرتي يحتمي الكون بظلاله

كن هذا الصبح بس يستجدي عطفك
لا ابتسمي له ترى يرتاح باله
والنهار اللي بدى واقف بصفك
ما ظلمك الضي في ظلمك عداله
اطلقي شمس سجنتيها بكفك
غير قربك ما لنا شمس استحاله
ما نبالغ لو تكلمنا بوصفك
انتي اجمل ما رات عيني يا هاله