كلمات أغنية ماهو حرام الحب في كل الاديان

البارحة يوم ارتفع صوت الاذان
يوم الظلام اسدل وجاك اول الليل

عديت فاللي كل ما اجيه عمسان
يقطع ضرم راسي عن البن والهيل

رجم مخاويني على طول الازمان
قد شافني وانا دموعي هماليل

بلسم جروح وطب في بعض الاحيان
واحيان لاوالله شر وغرابيل

والذكريات براسي تحط وتشيل

ذكرى الهنوف اللي ولو كان ماكان
مكانها فالقلب لا يمكن يزيل

ماشفت زين مثلها شوف الاعيان
من وقتنا الحالي وفي سابق الجيل

ياما كتبت من القصايد والالحان
في كل يوم وليل اجر المواويل

حبي لها من قلب ولسان وايمان
حب الدجيما يوم ذاق البهاذيل

ماهو حرام الحب في كل الاديان
مير الحرام انك تكب المواصيل

روحي ياجعل ايام عمرك تساهيل

صديت عن درب المحبه ياسلطان
صدت عتيبي بعيد المناويل

واعتضت فيه بخوة اللي لهم شان
خوة شرف ماهيب خوة مهابيل

اهل الوفاء والطيب ذربين الايمان
مايعرفون النم والقال والقيييل

فهد سعود اللي ليا صرت بلشان
وحدتني ظروفي وحسيت بالميل

هذاه مزباني ليا احتجت مزبان
هذاه مزبن من شكى لوعة الويل

تقول كنه كافل الانس والجان
مايقفل الجوال دون الرياجيل

هذا عدو المال والحشو والضان
لا قلت سيل بالكرم وش هو السيل

ياكثر ماخلص فواتير ف احسان
لله مايبغى من الناس تطبيل

فهد سعود ان كان للطيب عنوان
والله لتلقى اسمه فهد دون تقليل

ومن لامني ف محمد اخوه غلطان
هذا محمد لا برد بارد الحيل

كم من فقير جاه ثم راح بطران
يحذف عظام المال حذف المناديل

محمد اللي كان مانيب غلطااااان
خليفة الطائي ب ادق التفاصيل

والخاتمه والله يالاثنين الاخوان
قليل من يشبه لكم فالحلاحيل