كلمات أغنية ماحب العزلة

اطبق علي الصمت كن الكون حالة سبات
واعطاني الليل نحره واعطاني الصبح ظهره

وانا ما احب العزلة اللي كلبوها جلد ذات
الله يعين اللي همومه كل ليله تسهره

اتعبني التفكير في حال الليال المقبلات
من كثرة الافكار كن بوسط راسي جمهرة

محتاج وقت فيه ألملم ما بقا لي من شتات
مابه شعور اقسى من شعور البشر بالبعثرة

ماهو بلاقي باب فاتح غير باب المقبرة

فوق العيون حجاب ما يكشفه غير النايبات
مثل الحجاب اللي ما يكشف غير عند الغرغرة

يعيش رجل دون حلمه صادم اظروف الحياة
من الشدايد دوب يعرف صورته فالمنظرة

يقول حبل المشنقة حبل مثل حبل النجاة
ويزيد صملة بإزدياد الشدة الله ينصره

صدر السما السامي جهه تنضاف للاربع جهات
في نظرة اللي ما يلد مع ايمنه ومع ايسره

ما فيه شي يستحق الانتظار الا الصلاة
واللي لو تسمي على المفتون كنها تسحره

ومن زين عبلى بنت مالك ما تحرر عنترة

يحزني ان اوقاتنا الحلوة مجرد ذكريات
ولو يرجع الماضي ماهو راجع مثل ما نخبره

على العموم الوقت ما يعطي ربع ما قال هات
واللي ما يقدر ياخذ احقوقه وش اللي يقدره

ما يخطف عيون الرجال ويخطف قلوب البنات
الا كريم ينطلب جاهه وينخاف خطره

شروا الجناب اللي ليا جات الامور الكايدات
وقف مثل ميقاف جدانه وسيطر سيطرة

فيه القصايد من كبر قدره تصير معلقات
والفخر يكبر من كبر قدره ويصبح مفخرة

من طيب راسه ما يقال اسمه بدون مقدمات
ويمر ذكره فالمجالس مثل عود المبخرة

بالجود كن يدينه الثنتين دجلة والفرات
ولا يشتكي لو يكثرون اللي جال نهره

مواقفه في خدمة المحتاج مثل المعجزات
اكبر قضية في نظر غيره صغيره فـ نظره

ما دور الشهرة بـ انستقرام ولا سناب شات
حرن معاريفه مع العالم هي اللي تشهره

عبدالعزيز اللي فعوله بالمديح موشحات
اللي ورث تاج الفخر والمعرفة من مصدره

ابوه رمز من رموز المرجلة ومن الدهاة
اللي بصعبات المواقف قادرة ومقدرة

اكبر قدر واسمى فعل وابيض وجه وأنبل صفات
ملزوم تذكر والنعم في كل مرة تذكره

فهد زبون المجد والمزبان عند المعضلات
اسم الرشيد اسم صدح فالكون بره وبحره

ركن الظفير اللي مناقبهم على افواه الرواة
وفي صفحة التاريخ برهاف السيوف مسطرة

رجالهم من سطوته ما يحسب حساب الممات
اصلا ما سموه الظفيري غير من زود ظفره

مجدن ملا الدنيا صداه من السنين الخاليات
مافيه جاهل غير من يجهل من الناس اخبره