كلمات أغنية شمس الفعايل
- كلمات
- انس بن مسيعد
- ألحان
- خالد ال بريك
الراس تجلا عماسه فوحة ام القناد
والقلب تجلا عماسة شوفة ام جعده
حنيت للي تخالط صبحها بالسواد
قدامها القلب الاصوك تعتريه رعده
ترعا القلوب الخضر مرعا الابل للحماد
راحت مع الغادي اللي كن رجله يده
من حبها حببتني فالسهر والسهاد
اثر الهوا لا تمثنى القلب يستعبده
خضوع لله وطاعة مطلقه وانقياد
الحمدلله من قبل البلا وبعده
ياما طمرنا خطايا الناس طمرة جواد
من عاش مايدمح الزلات عاش وحده
بعض الاسامي مغره والوكاد الوكاد
شمس الفعايل تجلا عندها الافأده
ما قول أنس بن مسيعد طارق ابن زياد
اقول أنس بن مسيعد مايخيب جهده
رح بشر مطير مركاض المدايح سداد
من وايلي يبشر صاحبه بسعده
مكنوزة من هجاد القوم فيها هجاد
قصيدة تنفع الرجال مثل ولده
كل عنزي بني عمه ملوك البلاد
يحق له فالمفاخر لابلغ مقصده
ياحربة آلاد عبدالله نهار الطراد
دايم صبي المطيري للخصوم لهده
لو للثقل والرزانه والمكارم شداد
فهقتهم عنه لو جاء للرجال زبده
لاقيل ابن مدلج الامجاد قالت وكاد
اسم تواريخ نجد الانجد تمجده
هذا خواله هل الجدعاء عتاد وعماد
قام احمر العين قومة عاسفين الجياد
لين استقرت ظنونه من دوي رعده
وش لون اسميه سيف المرجله والعتاد
وبينه وبين الصقيل فروق محدده
السيف لامن فعل ردوه وسط الغماد
واهو ثلاثين عام فعوله موكده
والسيف مايفعل الا في نهار الجهاد
وراكان يفعل ونيران الفخر موقده
من كثر مايبسط اليمنى عطا واعتماد
لاشفت الارض الفسيحه ذكرتني يده
لاربعت وابرهزت للكلا والحصاد
زرع الجمايل حصاده جعلني ما افقده
اخوان راكان وربوعه صقور الهداد
لكن راكان لاجت للفروق وحده
ميزاني يازن الكفه بوزن الحياد
لا مالت الروس والا زادت الهربده
والمعتدي لاتعدا بالطغا والعناد
اما وطا صابره والا وطا جلمده
دون الوطن مايهادي لو يقولون هاد
هذا يصلي على روحه عشان بلده
متكبر الا ليا صار التكبر كساد
متواضع الا ليا صارت عليه زهده
ولولا الكبر يابقايا قوم صالح وعاد
ماراحت القوم في صالي سقر مؤصده