كلمات أغنية السلطة
- كلمات
- نايف معلا
- ألحان
- خالد ال بريك
عقب انتهى المهرجان وكل شاعر كتب
كحلت عين من عيون القصيد الحسان
نونية كنها مسبوكة بالذهب
ومزينة بأجود الياقوت والكهرمان
ولا أنجبت ما يحاليها بطون الكتب
ولا قرايح سلاطين الفكر واللسان
أبياتها كل بيت بحد ذاته أدب
وفيها من السحر شي فوق سحر البيان
كتبتها من شعور إعجاب مدري عجب
لو ابراهن عليها ماخسرت الرهان
كتبتها والحميا جمرها يلتهب
وتركت لأهل الغرام الشمع والشمعدان
اشره عليه ليا من قيل عشره ثمان
تقدير وإجلال وإنصاف ومشاعر محب
ماجيت ادور بها بين الأماكن مكان
للفاخر اللي نفاخر به رجال الحسب
للشامخ اللي شموخه ما يبي ترجمان
سفيرنا اللي على القمة بهمه وثب
همة بطل ما يهمه وش يجيب الزمان
اسمه وسم بين الاسماء بالذهب ينكتب
سما به بسيرته ماهوب بالهيلمان
السلطة محمد السلطة عريب النسب
سلطة ولا يقدره غير الله المستعان
منطق ويمنى يطول بها وصدر رحب
للحمل عده جمل وإن جاء المنافس حصان
يفتل شناباته ولاهمه أطلق شنب
مع كامل الاحترام وكامل الاتزان
والمجد مابه مدارى نار زدها حطب
ولا حققه من على الدنيا بخيل وجبان
مثل ما يبغى زمان الكيس والجبخان
والسلطة الي بنا له مجد ما ينحجب
ماجاته مبهرة بالهيل والزعفران
ساق الملايين للشرهين سوق العطب
ولا يكاسر ولا يشرط عليهم ضمان
حتى جمع في مراحينه صدور النخب
عينه على المركز الأول عيان بيان
وضح يشع بوباريها بياض الشهب
بدور لها ليا غاب الشفق ريهجان
أرقابهنه مناير والظهور القبب
وكن العرانين تقويسة هلال رمضان
متدليات السبال تقول مابه عصب
من كبر هاماتهنه ما تشوف الاذان
يمشي تحتها الطويل اللي ماصابه حدب
سند الغوارب عليها يثبت الخيزران
فيهن عجب كل الأشهر ماهو بـ عش رجب
معذور من شافهن ثم اتقى عقب بان
مالقبت نخبة السلطة مجرد لقب
نخبة وسلطة على كل البكار الزيان
يوم النتايج ماقلنا ليه ويش السبب
مرهين مير التشكي في المنافس هوان
والحمد لله جاب المركز المرتقب
وانشرحت صدورنا عقب صدور البيان
أغلى التهاني نقدمها قصيد وطرب
لذخر ناصر عسى ناصر لخضر الجنان
منا وحنا ذخاير مسفر وما نجب
مغايره مجدنا يرويه حد السنان
جدنا وسدنا وبيدنا بوقت النشب
وش لون ما نكسب الناموس وقت الأمان
لنا الثلاث ولنا الرده بيوم الطلب
وقضاية الشان والتاريخ شاهد عيان
والوادي الي يودي له طريق القصب
جابته صولاتنا ما جابه الصولجان
معين الأمجاد لو طال الزمن ما نضب
لو جات سبع عجاف وجات سبع سمان
يضاف لأفعالنا غير الشبا والشبب
ناموس ابو ناصر وفعله لامس البطان
تزهاه شلفا ولي العهد فخر العرب
وعز الله إنه كسب شعبية المهرجان