كلمات أغنية حالو دونها

الليل مالي غير ظلماه مدهال
ليلن تزايد وسط قلبي ظلامه

استغفرالله كل ما خيم وطال
يارب عفوك والستر والسلامه

تضربي همومي من الجال للجال
يومن كلن مهتني في منامه

النوم ولى والسهر حط منزال
بيني وبين النوم حرب الرغامه

واسترجع الماضي بحزن وندامه

اي والله الذكرى خطيرة وسلال
تجي ومعها عبرة وابتسامه

تضرب عروق المخ وتقول زلزال
وللحزن في وجهي يبين علامه

اللي ثلاث سنين هذا هو الحال
من طب نفسي لين طب الحجامه

الزول ناحل رايح شماغ وعقال
من شافني قال ابك هذا علامه

كتمت حزني مادرا عمن وخال
والقلب نوحه مثل نوح الحمامه

ولاتلحق العاشق شكوك وملامه

عزالله اني جيتها جية ارجال
مطلاب يد وحشمة من كرامه

لكن حالوا دونها قوم عذال
واغتال حلمي وهو باول فطامه

اخر لقاء منحوت في صم الاطلال
اخر لقاء زود بقلبي حطامه

مثل السجين اللي مكبل بالاغلال
من يوم شفت الدمع تحت اللثامه

قالت احبك والدمع صار همال
والله لاحبك لين يوم القيامه

لاكن في ستة وعشرين شوال
جاها النصيب وزاد قلبي سقامه

راحت وخلت كل ذكرى على البال
تدمي عروق القلب بالانهزامه

من بعدها صاير غريب ورحال
واحزاني اكبر من قطر والمنامه