كلمات أغنية وياك العليلة

شفتك مثلي تتألّم
تمشي اُو دمعتك زمزم
لا .. يا والدي اِتْبسّم
بالرّحله الطّويله .. ويّاك العليله
••••••
١
آنه العليله اُو قِسمتي ، هاليوم اَودعَك
نتفارگ اُو أدري الدّمِع ، صعبه يِرَجعَك
راح اَمسح المدمع إذاً ، ماراح اَفجعك
واِنته بعد يا والدي ، لا تجري دمعك
.
ما راح اَجرحك بالعتَب
ما تحزن اُو آنه السبب
يبويه
.
ما أستغني عن گُربك
روحي باقيه اِبجنبك
بس لا ينكسر گلبك
ما يحصل بديله.. ويّاك العليله
••••••
٢
جسمي المرض يتملّكه ، ويكثر ونينه
بس روحي حُرّه اُو ما تِظل ، للهم رهينه
ويّه المحامل مُهجتي ، تمشي اِبـ سَكينه
وآنه شبه ميته أظل ، باَرض المدينه
.
آنه اِبديارك حاضره
وروحي معاك اِمسافره
ويّاك دنيا اُو آخره
.
إمسح دمعةِ اِعيونك
راح اَمشي مع اِظعونك
شنهي العيشه من دونك
والله مُستحيله .. ويّاك العليله
••••••
٣
تدري الحبيب اِعله المُحب ، مهمـَ اِيتجافى
بين الحبايب ينعدِم ، بُعد المسافه
لا مو مهم من علّتي ، جسمي اِيتشافى
من همّ اِلِفراگ المُهم ، إنته اِتّعافى
.
شنهو المرض ؟ .. أتحمّله
فكرك بعد لا تشغله
روحي تظل بالرّاحله
يبويه
.
واِبكل معنى وجداني
يمّك بويه تلگاني
بين اِخْواتي واِخْواني
دمعك لا تسيله .. ويّاك العليله
••••••
٤
عاين خَواتي اُو صورتي ، ترسمها عينك
تشعر يميني اِبكل وكت ، تلزم يمينك
منّك قريبه اُو أستمع ، نبرةْ ونينك
ما تگطع آمالي سوى ، گطعةْ وتينك
.
آمالي تصفه اِبلا حبِل
لو لحظةِ اِمصابك تحِل
باَوصالك اِيموت الوصِل
يبويه
.
تحضر مُهجتي اِتنظرك
والسيف اِلتگه اِبنحرك
واِختك زينب اِبكترك
باِعيون العقيله .. ويّاك العليله
••••••
٥
أدري اِبرحيلك تنطوي ، صفحةْ دلالك
واِتفكّر اِنته اِبحالتي ، وْحالة عيالك
يالـ باخر اَنفاسك تظل ، مشغول بالك
إرحل كفايه اِمن العدى ، كلّ الجرالك
.
لا ، لا تكدّر خاطرك
ما أنسى دوم اتذكرك
كل عمري راح اَتنطرك
يبويه
.
واِنته اِلجيتي تتنطّر
يم باب الخلِد تحضر
واِتروّيني بالكوثر
وقصرك تعتنيله .. ويّاك العليله