كلمات أغنية رمش العين
- كلمات
- شقير الجذع
- ألحان
- نياف تركي
الا ياغزال فوق خده رموش سود
مظاليل رمشه ضافيات على خده
على خد ابيض مع بياضه حمار اورود
لاشافها راعي الهوى يلعن جده
اليا شاف رمش العين والاشقر المرجود
تقول الدروب الواسعه عنه منسده
اليا راح عود كن عنه الفضاء مسدود
جداه الونين وصفق يده على يده
يضيع كلام العقل ويضيع المنقود
من الهرج ماعنده لا هاته ولا وده
يعد النجوم الساهره والعباد رقود
ويرفعله الهاجوس ضغطه اليا حده
اليا جبتي اول صوت مني خذي رده
تنوحين طربانه اليا هز ريشك نود
وانا هزني حب صميم الحشا قده
ولا ياحمامه حددي للونين حدود
ترا انكان طولتيه طولت انا مده
اجاوبك وجاوب خلوج تبي المفرود
سروبه على الي فوق ماطولوا شده
سروبه غروب الشمس ومعارضه نفود
يحده عكاش الحزم للعرق ويحده
على الجيب الاشهب سايقه شايب عسرود
معودته ايام الشدايد على الشده
يحوفه يبي يمكنبه السوق عودك عود
يبيله مقاضي والمواتر تبي عده
يبي البن والهيل الخضر والتمر والعود
مواريث ابوه الي ورثها على جده
يبي الجاوي الاصلي ويبغى من الكمبود
ويبي الي اليا حطه على الجمر له نده
جبرته ظروف الوقت ولا ماهو وده
ولدها خيار وهي بعد من خيار الذود
تجر الحنين ودربها تلتفت قده
وبعد جا معود جت تروح ثياب العود
وتهايق على الصندوق بالراس وتمده
تبارى عبايرها على الخد يامعبود
وتشم الحبال الي على البدي ممتده
ولقت شي من ريحه على ربوة المعقود
وقامت تحجر الجيب من قدم وترده
وجاضة وجضة جضة الجايع المطرود
تحسب الشجر بحساب الادباش وتعده
وانا مثلها وجدي على صاحبي وجود
وجود الغني الي ضواه الفقر ضده
بعد كان يملكله عماير جدد ونقود
سحقه الله الي يبني العز ويهده
رماها بالاسهم يحسب ان السهوم تزود
وسرى والمؤشر بالحمر يتجه قده
ودخل للمدير وقال تكفى يابو مجود
ابي راس مالي لو نقص شي من عده
وقال انتهت لو جيت اعيده ماعاد يعود
حساب خذته البورصه كيف ابارده