كلمات أغنية جوه القلوب
بين أحلامنا وبكره وامبارح والذكرى
بنلاقي الناس عايشين بقلوب مقسومه اتنين
حلمنا يكبر فينا مهما نشوف بعنينا
بنحن ليوم لبيوت ولناس مابقوش عايشين
كان الحب مالينا ولقمه بملح تكفينا
وكنا نبات راضيين
وبيبان قافلين
كان الدفا جوانا بيشيل همومنا وشقانا
واهي مرت السنين
أيام تعدي ومابننساش عدت وماحسناش
كانوا أحلى يومين يا ع الحنين
مهما الأيام بتاخدنا وتتغير حياتنا
برضه اللي كان عايش جوه القلوب
عايشين بالإسم حياتنا وماسكين في اللي فاتنا
بإدينا نخلي بكره وبعده حاجه تانيه
وأجمل بكتير من الذكرى ومن اللي كان
دي الفرحه اللي إحنا عيشنا بنستناها جايه
وصبرنا كتير وخلاص أن الأوان
فاكر وش حبيبتي لما بتسمع سيرتي
وبلهفه وخوف تضحك بكسوف وعيون حلوين
وأنا مانساش مدرستي ولا قلمي وكراستي
حصه العاب ووراها حساب وعربي ودين
اشتقنا للمة عيله وعيال بتعمل هليله
فوانيس متعلقين
بركة فطار وسحور رمضان
صوت رفعت في الأدان الله عالحنين
وقفه تهل علينا بالفرحه تيجي وتكسينا
مبتسألش إنت مين
مين ينسى أول يوم العيد
والفسحه ع الكورنيش وريحة النيل
مهما الأيام بتاخدنا وتتغير حياتنا
برضه اللي كان عايش جوه القلوب
عايشين بالإسم حياتنا وماسكين في اللي فاتنا
بنشوف زمان دايما من غير عيوب
بإدينا نخلي بكره وبعده حاجه تانيه
وأجمل بكتير من الذكرى ومن اللي كان
دي الفرحه اللي إحنا عيشنا بنستناها جايه
وصبرنا كتير وخلاص أن الأوان