كلمات أغنية نفسي في داخلك اعاين
نفسى فى داخلك أعاين
وأروى روحى وأشوف منابعك
صحرا فى عينيا تتواثب جناين
ماخدة صوتك من جداول
وما خدة صورتك من كهارب
مولداً ميدانو حافل
كلما يصبِّح ... تجيهو الناس جحافلْ
يا سلام ... يا سلام
لمّا تعبرى فى الشوارع
شوفى كيف الناس تصارع
ناس تطفِّر .. وناس تد فِّر
فى البشابى على نجومك
وكل زول من عِنْ سُلافك ..
لا لا .. قال دايرلُو كاسْ
يا سلام ... يا سلام
مرّة طربان .. شلت صوتك شان أغنى
قلت آه ياليل .. وآه
إنتى أول .. وإنتى تانى .. وإنتى تالت وإنتى رابع
نافرة زى صيد الخلا
وصافية زى نبع المنابع
وقلتى لى غناى .. خلاص
حلوة عينيك زى صحابى
عنيدة كيف ... تشبه شريحتين من شبابى
حلوة عينيك زى صحابى
وزى عِنب .. طوّل معتّق فى الخوابى
وسمحة زى ما تقول ضيوفاً .. دقّوا بابى
فرحى بيهم سال .. ملا .. حتى الكبابى