كلمات أغنية حب الناس كنز
- كلمات
- محمود خليفة
- ألحان
- وليد سمارة
الرزق صاحب جدع طيب وابن حلال
الرزق ساعة رضا من ربنا في الحال
الرزق كلمه طيبه ساعة اللزوم تتقال
الرزق مش جيب اتملي ولا بنك فيه شغال
الرزق اخ وسند لو زمني بيا مال
الرزق ابن اتولد ويكون من الابطال
الرزق دعوه مجابه تصلح لنا الاحوال
الرزق حب بين البشر أفعال ومش اقوال
الدنيا فيها ناس كتير على قدها بتعيش
وناس غلابه بتنكوي عشان بتاكل عيش
وناس بتشقي وتجتهد وبردو ميكفيش
الرزق مش بالفهلوه بيجي او ميجيش
مقسوم علينا كلنا مفيش غني وفقير
عندك فلوس عندك هنا عندي سعاده وخير
وستر جاي من ربنا ولسه عنده كتير
مش كل الرزق فلوس
حب الناس يسوي كنوز
الدنيا دي فيها دروس
تفهما تعيش مبسوط
لو رزقك عز ومال
في غيرك رزقه عيال
انت في كل الأحوال
واخد حقك مظبوط
الرزق زوجه طيبه في عشرتك بتصون
وناس اصليه قريبه منك تكون في العون
الرزق احساس بالرضا لو الهموم بالكوم
ومها يديك ربنا متكونش يوم فرعون
نسينا ليه نفسنا وباصين في حال الناس
عايشين وكل همنا نجمع فلوس وخلاص
نعم كتير من ربنا م الساس لحد الراس
تصعب علينا نفسنا ونشكي ضيق الحال
نسينا ان ربنا محول الاحوال
بيبقى ليك دهر وسند لو حتى بختك مال
والدنيا ساعه من التعب وساعه راحة بال
اتقل خير الناس بقم تملي باصين فوق
الناس قلوبها اتغيرت لا عاد ادب ولا زوق
بتشيل حمول فوق اللزوم وتقول عايش مخنوق
ارضى بنصيبك واشكره هتتعدل وتروق
مش كل الرزق فلوس
حب الناس يسوي كنوز
الدنيا دي فيها دروس
تفهما تعيش مبسوط
لو رزقك عز ومال
في غيرك رزقه عيال
انت في كل الأحوال
واخد حقك مظبوط