كلمات أغنية سؤال
اسع ياتو فيهم يا خلق الله عاد
او عاد يات مصير لى وللولاد
تبدا امونه رحله ما كان فى الحساب
باراها الزمن شبعا فى العذاب
من يوم سافر احمد قاصد للجنوب
باكى امونه فرقه هزت للقلوب
زوجها ابو الولاد الخاتى العيوب
مفقود من سنه واعلنوا للحداد
وتمر السنه بى فوق السنه
تمو اربع سنين مرت محزنه
فكرو فى الكفيل وبيناتن جنا
ومحل الابو بقى عم الولاد
عقدولو الاهل سوو المتبع
من مرت الاخو الفات مارجع
تنداس المشاعر او قول اقتنع
لازم الناس تضحى شان لبنى وعماد
ويتم العقد بينات الدموع
لا فرحا كتير لا ضوت شموع
عجلات الزمن مابتقبل رجوع
ومابتمشى الحياه زى ماالزول اراد
سنتين بالكتير كان جابو الولد
والحزن القبيل جواهم برد
سمو على الفقيد الراجل الصمد
شان حفظ الاسم وتاكيد للوداد
وما كان فى الحساب الزمن العنيد
ينسج فى الخيوط من زمنا بعيد
فى يوما عصيب وما فى البال اكيد
من اول جديد اتكال الرماد
فى لحظه سكون عماها الديار
حس الباب نقر قايله امونه جار
تاريهو الفقيد كان فى الانتظار
مفقود الجنوب يرجع تانى صاد
كان صدمه قاسيه فوق الاحتمال
خلتا بين جحيم واقع ام خيال
اختل العقل وكان اخر سؤال
اسع ياتو فيهم يا خلق الله عاد
او عاد يات مصير لى وللولاد