كلمات أغنية ام الحسن
وقفت بعد حلبت لبينه الشاي تكورك يا الحسن
يا ام الحسن وينو الحسن
ولمن صفت رغوه شخيبات اللبن في حلتا المبنيه من طبق السكن
واقفه في حوش البهايم ولسع تكورك يا الحسن
وتلاوي في الحمل العنيد
جاها حسا من بعيد مارق من القاطوع ورا
قال ليها خير يا الحاجه خير
قالتلو خير تعال لي جاي دايراك تعنون لي جواب يا الراسي لولدي الخدير
لا تبقي زي شافع السرير يقول لي زين ايمه زين وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقه البيضاء من لون القلم
بعد المغيرب بي شوي جاها الحسن تعبان يسير
العشى غنمو من الدرب وسرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضل لي بس منو اليقين
وانت طول في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات يا جناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين انا كت برسلا ليك
في لوري الخزين