كلمات أغنية حليف الصون
ياحليف الصون فلتدم في علاك
إنت زول معصوم ولا إنت ملاك
إنت بدري وكيف الخدر ظلاك
أنت كوكب نور تشتهي الأفلاك
فيك كم آيات يالحياك جلاك
منظر الساحرات ومنظر الأفلاك
ياجميل النور ماسه من عيناك
منظر الأنوار طالعة من مغناك
والشباب يترنم بي معاني غناك
والجمال الفيك عن مديح أغناك
كل معاني اليوم طالعه من معناك
تبسم الأيام لوبسمت سناك
والزي جمال الحور زيه فتو هناك
مهما أجيد أوصاف أشوفها حامله صفاك
يانقي اللون أيه أقول في صفاك
الحرير يخشى للصفا الصافاك
والتبر يبقى زي صفر لصفاك
تخشع الأبصار من شعاع محياك
وعُقَّل الأفكار يسرحن في ضياك
النفوس في هواك يالهواك في حياك
أنا عندي يوم الفوز حبيبي يوم رؤياك
الرآك غير شك بي حبيبه رعاك
ليه لأنه يشوف كل شئ يرعاك
حتى نور الكون حجبوه معاك
يابهي الطلعة أنا كيف خلاصي معاك