كلمات أغنية ام المعارك ولعت
- كلمات
- ضيف الله السميري
- ألحان
- صالح اليامي
يامركي دلة الرسلان فوق الوجار
اليا استوت صبة الفنجال الاول سقه
كيف الرجال الدواهي مسرجين المهار
يوم ان للموت صوت وللحلوق اشهقه
دون القبيله ودون الفاطر ام الحوار
مايذخر الكفو في جوف الحزام فشقه
مايين فرض اعتبار وبين رد اعتبار
كم فارس من يمينه تنوخذ بندقه
يسابق الروس للناموس ماتسبقه
حنا عتيبه ثقتنا تجلب الانتصار
في كل شوط نجي له شمسنا مشرقه
نعاف هرج السعه ونجيد لعب الكبار
ونسعى لجمع الصفوف وننبذ التفرقه
نحشم اللي لهم قيمه وقدر ووقار
ونهمل الغاوي اللي ماحشم منطقه
ياطامع في منافسنا ترى الشوط حار
ذق ضربنا اللي يعيفك المزاين ذقه
ماعندنا غير وسم واضح وقدح نار
لاتحسب الصيهد المشهور دق ورقه
معنا على دكها حرية مطلقه
مانعرف اللفلفه والرمي خلف الستار
على النقا نطلب الناموس ونحققه
ماندحم الشوط غير بنادرات البكار
مرع يجيها على دحم الصفوف اشفقه
شعل سواة اللهب والا سواة الشرار
اللي يبا يقترب من نارها تحرقه
تدجر من الزود وتخايل نجوم المدار
من طاح بنحور سمارات راح مرقه
جمهورها يوم جا للعرض من كل دار
صارت عليه الصياهد صالة مغلقه
حطو لهم في فقارة نجد الانجد مطار
الامر محسوم والجمهور كله ثقه
تصويتهم يحسم امر الطايره باختصار
ويسمر الخصم فالسندان بالمطرقه
نخبة راع القبضه اللي مايبا مستشار
لـ احكم على خصمه القبضه يجيه غلقه
يبرا لها مسعد وحامد طوال العمار
كم من سجين فعول ايمانهم تعتقه
ذخاير اللي سمر كبد المعادي سمار
عود على كل قمه رافع بيرقه
دواهي في مضايفهم ردوم الفقار
وامجاد مشيده وافعال موثقه
ذولا هل الفزعه اللي للحميا شعار
في مدحهم كل بيت يعادل معلقه