كلمات أغنية مقاديم السرب
- كلمات
- سليمان بن ساقه
- ألحان
- خالد ال بريك
تمادا الليل واخفيت القمر فى ضلمة الديجور
وطارف غترتي طرق الهوى لاهب يطرقها
مجنب عن دروب الشعر والشعار خمس شهور
ونفسى فالزمان التالي ادنى مايضايقها
ياجمهور الشعر ماني على الساحه بخيل شعور
ولكن القريحه ماتغني مايوافقها
انا ماني بشاعر راس ماله سبحه وحنجور
هواجيسه من البارود الاشهب ماينشقها
ليا قدمت رجلي ماقدر اثنيها ولا افهقها
بعد ماجيت للساحه زعل ضيدان بن منصور
ليا قلت القصيده يحسب اني منه سارقها
مثل ماتذخر عتيبه سفر وحبيب ومستور
انا تذخرني العجمان لارزت بيارقها
احب اللي دماه من الحمايا كل يوم تفور
واحب اللي ليا اجمتعت ربوعه مايفرقها
واحب الليل والسجه واحب الخايع الممطور
واحب ابرا لوظح تشعف التاجر حقايقها
واحب اللي ليا فرع تبادا من جبينه نور
واحب الساعه اللي مادرينا عن دقايقها
ولا الحق مغريات الوقت جعل القوم تلحقها
والى من كبرت الدعوى عطيت الخط خشم المور
تحت رحمة كريم يخلق الانفس ويرزقها
ويممته على شيخ لشيبانه وربعه دور
مع جده عوال عجيم قد ثارت بنادقها
ابن حثلين بان اسمه قبل لا يظهر الدستور
علوم الناجعي حتي لسان الترك ينطقها
مقاديم السرب يوم القبايل يرسلون سبور
قبل لا تعطي الدوله عباد الله بطايقها
خوال محقق الروئيه خوال محمد المنعور
شيوخ نايد العربان ماتجهل معامقها
من ال معيض وال معيض لا جا الماقف المشهور
جنابيهم يدور الحول ماتبرا مفاتقها
على راكان بن خالد فناجيل المديح ادور
عليه القهوجي من بد خلق الله سايقها
على شيخ من شيوخ الجزيره للقبيله سور
ذخر ربعه ليامن ساقت الدنيا فيالقها
ليا اهتزت جبال الارض يزبن فى حجاه الطور
تنصاه الرجال اللي ملام الناس خانقها
ذرانا لو علينا فرد حمزه كل يوم يثور
رزم المال دون عجيم فـ الديات يحرقها
ولامن ثارت الهيجا تشوفه ينطح الطابور
طويل الباع حتى صيدته ماهو بيدرقها
مواقفه الكبار اللي تجبر عظمي المكسور
لو ابديها على العقال يمكن ماتصدقها
ليامن قالت الدنيا دبل وثري والا فور
تحراله قبل ماتاخد الإكه وتبرقها
وحنا ربعه اللي روسنا مابان فيها بور
يا لولا فرض ربي كان تدفن ماندنقها
وخاله ذخر خلان الاشده حلفنا المذخور
ليا جود مفاتيح القضيه مايلصمقها
ابن عايد ليا كبرت وجاء وسط الامور امور
تنصاه القبايل والرقاب الخضر يعتقها
عسى راكان بن خالد من صدوف الزمن ماجور
عسى ناس تبي طيحته ربي مايوفقها
فداه اللي مواعيده مع ربعه وعد بلفور
ليامن جاته الاوضاع يسحقها ويمحقها
رجال ماتعاونا ليا ضقنا بمال وشور
عسى اللي يغرق البابور وسط البحر يغرقها
بشوت ماتذري من نصاها لبسها ديكور
تعلقها على المعلاق والا ماتعلقها
لون ان الرجل مايقرب من المشبوه والمحظور
ترا بقعا من النكبات ماتخلا علايقها
ياكم رجال امسى فيه يده مال وذهب وقصور
وجاه الصبح وايدينه على اللي راح يصفقها
مقاديمك مع ربعك حزامك بنكك المذخور
سواة الغيمه اللي لا ضميت يلوح بارقها