كلمات أغنية تثير السعاطير

تبينت غر المزون المزابير
والبرق يرسم في نحرها قلايد

واستبشر الخاطر وجتني طوابير
غفل البيوت النادرات الشرايد

واخترت فيها اللي تثير الصعاطير
لاسمعها المطنوخ فز وتزايد

تصدر من اللي ماغرف ضحضح البير
وتارد على اللي ماضرا بالزهايد

في مدح ابن مرعي صبي الوكايد

جاتك يابو ناصر بيوتي مباكير
فرايد من نادرات الفرايد

اغلى من الياقوت عند الشواعير
واحلا من اللي بين خضر الجرايد

سلام ياراشد محبه و تقدير
يالوافي الصافي وسيع البنايد

يا احد من حد السيوف البواتير
يافزعة اللي مالقى له سنايد

مجدك بكفك يازبون المخاسير
في كل يوم ولك فعول جدايد

مواقفك تشهد بوقت الشدايد

وقت اللوازم تشبة لهضبه النير
يزبن عليك اللي بصدره وقايد

لاثارت ظروف الليالي معاصير
والكف جفت واصبح الحمل كايد

تطفي غبونه بالكفوف المغازير
تجعل لهيب هموم صدره رمايد

ومن طنختك تعتق رقاب المناعير
مثل ابن شارع يوم ينخا البدايد

حذفت بالمليون من دون تجيير
متنك يشيل الحمل لوكان كايد

يمناك تندا في الليالي المعاسير
ترهي بكف تتعب اهل المدايد

الله يجيرك من ظروف المقادير
ياللي فعولك نادرات حمايد

واسلم ودم عساك من خير في خير
وعساك من زايد بزايد بزايد