كلمات أغنية العجوز
وافيت قبل امس في الديره عجوز
عليها واشكالها اللعنه تجوز
ما تقرب امر خبيث الا تفوز
همها في العمر تحليل الحرام
قربت مني وقالت في ندم
هالطريق يودي لسوق الغنم
قلت انا مدري اسالي شخص فهم
وابعدت عنها وتوسطت الزحام
تابعتني والعيون مشهرات
تركض بسرعه ورافعه العباه
قلت وش تبغين قالت لك وصاه
جارنا ابو فلان يهديك السلام
قلت هذا اللي تسمين اجهله
قالت تعرفه وتعرف منزله
بتعترف ولا يالله نوصله
يظهر الكذاب منا بالكلام
قلت انا والله غشيم في البلد
لا اعرف شوارع ولا اعرف احد
واحلف لك ايمان في الرب الصمد
اني معك صادق في ذا الكلام
قالت الايمان عندك جاهزه
ولو نقضي الفين حلف بارزه
حجتك هذي قديمه وبايزه
يالله مشينا لا يجينا الظلام
وقلت انا مواعدلي انسان عزيز
وسط منفوحه ومن حول النشيز
بوصله اخشى ان موعدنا يبيز
ابعتذر منه وارجعلك قوام
قالت اصبر شف معاي اربع صور
حافظتها لك يجيلي من شهر
واظهرت من بينهن صوره قمر
يبري الالام ويزيل السقام
قامت بي الارض والدنيا تدور
ودخلت بعد الزعل دنيا السرور
وقربت مني وقالت في غرور
بتروح والا لا تطول في الكلام
قلت انا بمشي معك للي تبين
لو في طريقي ذياب جايعين
وان ما كفى اليوم لو نقعد سنين
انا تحت امركم ياهل الغرام
قالت مشينا وخلك من بعيد
من شان في البيت انسان عنيد
كل ما قلنا نسى عناده يزيد
قليل حشمه ومفقود واحترام
قلت انا بقعد على هذا الرصيف
كله على شان من دمه خفيف
لو يقفي البرد ويجينا المصيف
ما رحت حتى اشوفه لو كلام
راحت وفي ظرف ساعه عودت
وقربت مني وفي يدها اشرت
قالت مشينا ترى اللمبه طفت
الجو صافي وشارعهم ظلام
وادخلتني بيت مثل المقبره
ارضا وحيشه خلاوي ومقفره
الطوايق فاتحه ومكسره
يشبه عشاشا تبنا للحمام
قلت يا خاله اذا عندك بساط
ارجوك هاتيه احسن من بلاط
قالت لي ما اخبر سوى هذا السماط
اصبر دقايق وتمشي في سلام
قلت انا ما عاد ابي شي بتات
عجلي نادي لنا زين الصفات
قالت المذكور لاجا من الصلاه
ينام بدري على شان الدوام
قلت يا خاله ابي منك السماح
بروح للبيت وارجع في الصباح
قالت لي ارجوك خلك من المزاح
بنوم انا وانت يابن الكرام
سكت و النار في قلبي ولعت
وقلت ابي الدكان اباخذ لي بكت
راحت وفي ظرف دقيقه عودت
وجابت بكت كنت من عشرين عام
قالت وش الراي نرقى في البراد
قلت انا فيما تشوفين السداد
وكشفت راسا فقد ريح السواد
جعل ماهي للعواطفه للوشام
قلت انا مادامت انها لوحدها
ليه من راس الدرج ما ادفها
وان ما غشت في الخياشه الفها
والى صحت لينها كومت عظام
بعدين فكرت في حل سليم
ارقى بلا غتره وكني مقيم
واحلف لها برب زمزم والحطيم
انها تشفي جروح اهل الغرام
وفي اذنها قلت ياشمس النهار
القلب من يوم شافك شب نار
وفي نفسي اقول ياليت القطار
يقسمك نصفين يابنت الحرام
قامت تشاخر وانا احسبها رقدت
واثر اللعينه لرايي خططت
مقصودها تكتشفني من تحت
قالت على وين قلت ابغى الطعام
قالت انا خابره باقي الفطور
من قبل قبل امس ماشفت القدور
وان كان تبغى جبته في سرور
نمشي على رضاك ياولد الكرام
قلت بالله دخيلك عجلي
واذا جيتي راس الدرج اتمهلي
وفي نفسي اقول بالله وصلني هلي
اعيش في نور من بعد هذا الظلام
طالعت بجدارها لينه قريب
واخاف اطب انكسر ماعاد اطيب
طبيت والله يسر للصعيب
ومن بعدها تبت من طرد الغرام
من عقبها تبت من طرد الهوى
قلبي نصحته وللتوبه نوى
قلبي من العجز بالنار انكوى
والحادثه صارت في شارع سلام