كلمات أغنية ملذات الهوى

على عيد انكساري في غرامك قبل تسع سنين
تذكرتك وقلت آكلمك والنية النية

آلو لبيه يأغلى من ذبحني قبل عام ألفين
ومت ولا حييت إلا على ذكره وطاريه

أحبك وين ما سجت عيوني في الزمان الزين
وسججني الزمان إللي متاهاته خيالية

رعى الله كل يوم مرنا ما قبل ذاك الحين
على ذمة صبا الأيام والأحلام وردية

وأنا ما طاب لي إلا ما ورى العشرين بشوية

ياحلو أحلامنا ومراهقتنا والبلا بعدين
كشفنا ضحكة أول حلمنا ودموع تاليه

عفا الله عن ملذات الهوا والعشق والتخمين
وسجات الغرام ولذة الحب الحقيقية

فديتك يوم تاخذني على كيفك ولا أدري وين
معك من وين ذعذع هواك ومالت الفية

غدينا كنك الشاعر وأنا واحد من الغاوين
نهيم بكل واد من العليا للعزيزية

وبعد ما فاتنا ركب الحياة وشفت شوف العين
مسارات الطريق والاتجاهات المصيرية

مصير الشاعر إللي خانت أوزانه قوافيه

خلاص اعزم على الفرقى ولا لك في رقبتي دين
ترى حنا تعدينا الخطوط الاستوائية

تفاهمنا على حسم الأمور وكلنا راضين
وتوادعنا ما كن قلوبنا خضر و هواوية

ومع هذا عجزت أسج وأنسى وأترك المقفين
أغصب القلب لكن الغلا قدرة إلهية

أعن لكل ما في نجد حتى شارع الستين
وأحن إلا ذعذع الغربي على أهل الشرق عصرية

وإلا منه سرى من كل ليل حروة الثلثين
عرفت إن نسبة النسيان دون اثنين بالمية

عسى ربي يعافيني ولا يبلاك قول آمين
تراني كني إللي واطي له جمرة حية

وتراني يوم أكلمك فديتك عقب تسع سنين
ما غير أهيض العبرات ولا النية النية