كلمات أغنية سبحان خالق لكوان
سبحان خالق لكوان خلق الانسان مساوي
عطالو صحه لبدان وجعلو ضعيف وقاوي
فضلو على الملك والجان بالعقل الناير ضاوي
سكنو فسيح الجنان جنه فراشها خضراوي
شكر ادم الرحمان لطاعه المولى ناوي
دعا مولانا لملاك اتاو في الحين وسمعو
قال اسجدو لذاك ادم انا صناعو
قالولو سبحانك سجدو لادم وخضعوا
بقى غير الشيطان واقف ما بغاش يسجد
نطق المولى غضبان مالك ما بغيت تنفد
قال انا يا منان خير منو ماني ساجد
هذا فعلو مشيان يكذب يقتل ويفسد
هو خلقتو من طين وانا من نار مصور
ما نيش من الساجدين ولو نمشي للمحشر
قال اذهب يا لعين في جهنم تتحشر
بقا ادم في نخوه عيش وحدو في جنان
اوقات سعيده حلوه في وسط جنه رضوان
خلقلو ربي حوا ام جميع النسوان
شجار وظل وخلوه لا بروده لا حمان
صحا من النوم لقاها تضوي كما القنديل
شعر كي الليل كساها على الكتاف مطلوق طويل
صار معلق بهواها نارو تشعل شعيل
سال مولاه وقال سيدي ربي من هاذي
اجابو ذو الجلال هاذي هديه من عندي
حوا ام الجمال نكافي بيها عبدي
كولو من الرزق حلال الا من الشجره هاذي
الا من الشجره هاذي لا تقرب يا انسان
راك تتسمى متعدي ونضحى عنك غضبان
بالاك تخالف وعدي ويغرك الشيطان
جاه الشيطان يغرو على الشجره اللي وصاه
مولاه ما يخالف امرو خاف من عقابو وبلاه
بالحيله حب يجرو حتى يعصي مولاه
صابو حادر من شرو ما صاب كي يدير معاه
بقى حاير ويخمم في الحيله اللي تغويه
راح لحوا يتذمم قاللها انتي تسبيه
ياكل من الشجره يفهم ما كان من يسمع بيه
راحت ساماتو حوا وبقات ترطب فيه
ادم ما بقاتلو قوه بحنانها لعبت بيه
عصا وما صابش فتوى وغضب مولاه عليه
ادم مابقاتلو قوه بحنانها لعبت بيه
عصا وما صابش فتوى وغضب مولاه عليه
غضب ربي ورماهم خرجو منها لثنين
حتى الشيطان معاهم للارض نزلو في الحين
صارو عديان وعداهم حتى ليوم الدين
هكذا قدر مولاهم يوم خلقهم زوجين
بالشقا في الحياه بلاهم ولبدا مفتونين
هذا الابيات هداهم الهاشمي عبد حزين
في لاخره نكون معاهم هو والوالدين
بجاه من يشفع لهم محمد الامين
سبحان خالق لكوان خلق الانسان مساوي
عطالو صحه لبدان وجعلو ضعيف وقاوي
فضلو على الملك والجان بالعقل الناير ضاوي
سكنو فسيح الجنان جنه فراشها خضراوي
شكر ادم الرحمان لطاعه المولى ناوي