كلمات أغنية الساحر

تحية في بادئ الكلام للأسياد وللعوام
قصتنا قصة قرية في أرض الله من ألف عام
قرية كانت عايشة في سلام أحوال الناس تمام
الصبح الناس تشوف أشغالها ييجي الليل تنام
ليلة الخميس يا للسمر يا البت لو جد موضوع
الجمعة الناس تزور الناس عشان باقي الإسبوع
بين زراعة بين حراسة بين تجارة دراسة
حرف أغلبها بالوراثة
حياة بسيطة والخلاصة
الإكتفاء
القرية مش في سباق
ميعرفوش حياة غير دي فيقارنوا يحسوا باستياء
ومش ملايكة بينهم غيرة وفي كدب ونفاق
لكن عموما الدنيا كانت ملمومة
في نفوس بتشيل وتفضى مفيش نفوس مسمومة
بأي حكم الناس بترضى فالصراعات معدومة
لا حد عارض عمدة ولا حراسه احتاجوا شومة

يا سامع يا كريم إستعيذ من الرجيم
قريتنا الهادية زارها في ليلة شؤم ضيف لئيم
وقال المولى اختص عبده بالعلم القديم
علم السحر لكن هداه إتجاه سليم
فاستغله في إنه يساعد ناس بدون أغراض
ملوش أسياد ولا طلبات
مفيش بخور ولا حركات
قال م النيل حتى الفرات انا صانع للناس كرات يشوفوا فيها عيشة ناس من مختلف حضارات
لحظة بلحظة وبشكل دايم مش فترات
مفيش قيود على النظرات ملهاش عدد مرات
وإختياري في قيد واحد على الأعراض
فشيخنا قال ملعون
والباقي قال مجنون
كورة ايه اللي تكشف غيب وتسافر بالعيون
فقال آدي الجمل وآدي الجمال
وطلع كورة وقال أهو ده اللي قولتوا عليه محال

دخلنا في الكئيب
صلي ع الحبيب
ذكره رحمة لينا لإن بيه النفوس تطيب
القرية إتلمت عاللي يخلي روس تشيب
كله يبدأ بالتكذيب يبص في الكورة يقول عجيب
وبعد ما تاهت العقول وأتبدل التكذيب بقبول
خطف إنتباه الناس فجأة صوت الشيخ بيقول
ودي مين يعوزها غير مخبول
ايه حاجتنا إن احنا نعرف حال الروم أو المغول
لتعارفوا
كتاب الله يا شيخنا اللي تعرفه
ربك خلقنا شعوب بطرق مختلفة بيتصرفوا
فلما غيرنا يصيب في شيء منعرفوش نعرفه
نكون بنيان مرصوص بدل ما نكون اللي أسرفوا
من أهل القرية واحد واحد قال عايزها
الساحر قال ليكوا شخصيات مختلفة ولازم أدرسها
أصل كراتي معمولة خصيصا للأشخاص وده بيميزها
معمولة على ذوق الفرد أو الأفراد اللي في حيزها

نبدأ ب أخونا راضي كان عايش وراضي
لحد ما شاف في الكورة ملوك أصحاب قصور وأراضي
شاف اللي بيصرف تل مال وطول الوقت فاضي
فحكم بإن الدنيا ظالمة دي مش محتاجة قاضي
كره بيته وجلبيته وكل شيء في محيطه
كل ما يتفرج أكتر كل ما تتحطم نفسيته
أصل بيزيدوا فيزيد تساؤل ليه ده مش في إيده
خصوصا وإن معظمهم لا في مهارته ولا تربيته

تانينا الأخ سعيد كان عايش سعيد
شايف في الدنيا خير يكفي خلق الله ويفيض
بس في الكورة شاف عبيد وسيوف من الحديد
وحروب وناس بتموت من الجليد حتى الجليد
حس بتهديد وبحزن وإنه محتاج يعيد تفكير في واقع ظنه خير بس طلع مريض
يمكن بعيد بس اللي شافهم دول مش جنس جديد
هما ناس وأهل القرية ناس وقاع الناس غويط

العمدة جت في باله فكرة بعت للساحر جاله
قالهاله فقاله الساحر إنه هيعملهاله
يومين ونادى منادي على الكل الحضور الآن العمدة هيوريكوا شيء مهم في الميدان
الكل حضر في الميدان كورة عملاقة فوق حجر
العمدة قال أهي دي هتعرض حال بلاد وغجر
اشكروا القدر إني اللي بحكم احذروا من البتر
لولايا كان زماننا في حالهم بس المولى ستر
فحمدوا ودعوا يطول أمده
مين اللي يكره سنده غير القلة اللي عندوا
وقائدهم المذموم اللي بيكره الخير لبلده
فانفلتوا وقالوا الكوره وهم لكن ما ثبتوا
الساحر قال الكورة عاجزة تخلق زيف
قالوله منعا للنزيف جنب الكورة دي هتضيف كورة متجيبش شيء مخيف حتى لو كان ده تحريف
كورة متجيبش غير ربيع يبين إن احنا في خريف
وفجأة أهل القرية بقوا اتنين
حزبين رأيين عالم ليه وشين
كله مصدق اللي شايفه في كورة م الكورتين
قريتنا مكانتش تعرف حرب دلوقتي في حربين
حرب نفسية سببها آثار الكورة على كل شخصية
حرب أهلية سببها ناس أنانية فاقدة المصداقية
كلمة ختامية لو عاجباك الأغنية شك فيا
عشان هي كورة لفكرة في راسي قد تكون وهمية