كلمات أغنية مية مية كانت هتفرق

لو كنت عارف ان هى دى المرة الأخيرة
مية مية كانت هتفرق فى الوداع
لو بس كنت عارف ان دى المرة الأخيرة
مية مية كانت هتفرق فى الوداع

كنت يوميها اكيد هبيت عند جدى فى شقته نلعب ورق
نسهر سوا ومش هسيبه علشان ينام ليلتها من بعد الدوا
أو يرد الشيش عشان ضهره بيتعب م الهوا

وكنت هقوله يعنى بذمتك
آخر نفس ساقع أخدته فى صحتك
بقى ما يساويش حبة وجع؟ بطل دلع
جدى اللى مات دفيان ليلتها باللحاف
لو كان عرف ان الليلادى وداع لأنفاس الهوا
مكانش رد الشيش فى آخر ليلة له، مكانش خاف

كل الشوارع والمباني اللى مش هدخلها تاني
والأغانى اللى لما سمعتها دندنتها من مرة واحدة بالسماع
مية مية كانت هتفرق فى الوداع

يا كل حاجة كسبتها او سيبتها او ملحقتش اشبع منها
اكمنها قالت هنروح مع بعض فين
يا ناس يا عبط يا عاشمانين فى فرصة تانية للقا
بطلوا اوهام بقى وكفاية احلام واسمعوا
عيشوا بذمة وودعوا كل حاجة بتعملوها
وكل حد بتشوفوه وكل كلمة بتقولوها وكل لحن بتسمعوه

عيشوا المشاهد كل مشهد زى ما يكون الأخير
واشبعوا ساعة الوداع واحضنوا الحاجة بضمير
اللى فاضل مش كتير